HOLMEOMRÅDET

Området rundt Holmeknappen i Meland kommune er historisk sett eit interessant område. Holmestova og Sjøbua på Holmeknappen er kulturminne det er vel verdt å vitja. Holmeknappen er frå gamalt av ein sentral plass for folk i Vestbygd på øya Holsnøy i Nordhordland. Frå gamalt av var dette støet viktig for folket til byføring; som utgangspunkt for ferdsle til Bergen. I forteljinga "På torghandel i Bergen" fortel Helga Storedale Tjønn om den ti år gamle Karl Tveit som i 1904 dreg ut frå Holmeknappen saman med mor si for å selja varer på torget i Bergen.
Det har vore bakeri, butikk og hotelldrift på plassen. Bakeriet og butikken er i dag forsvunne, men hotellbygningen står framleis der og vert i dag brukt som privat bolig.